Напярэдадні Міжнароднага дня салідарнасці жанчын паслы, кіраўнікі прадстаўніцтваў міжнародных арганізацый у Беларусі і бізнес-лідары запрашаюць усіх зацікаўленых жанчын у Беларусі далучыцца да ініцыятывы #ЦеньНаДзень (job shadowing ад англ. «job» - праца і «shadow» - цень).

У ходзе стажыровак #ЦеньНаДзень, якія ўпершыню адбыліся ў 2019 годзе, больш за 20 маладых беларусак з усёй краіны правялі адзін дзень з кіраўнікамі замежных прадстаўніцтваў і бізнес-кампаній. Усе ўдзельніцы ініцыятывы атрымалі ўнікальны досвед і даведаліся, як працуюць міжнародныя арганізацыі.

Сёлета арганізатары вырашылі памяняць фармат бліц-стажыровак і прапануюць жанчынам па ўсёй краіне запрасіць паслоў стаць сваім "ценем". Што гэта значыць? Любая жанчына, старэйшыя за 18 год, можа на адзін дзень стаць настаўніцай для кіраўнікоў міжнародных арганізацый, раскрыць розныя аспекты сваёй справы, распавесці пра выклікі і падзяліцца досведам.

Для таго каб падаць заяўку, падыходзіць любы занятак, у якім вы дасягнулі поспехаў і можаце выступаць у якасці настаўніцы. Вы можаце быць менеджаркай па продажах у кампаніі, кіраўніцай вышэйшага звяна, працаваць у школе, на заводзе альбо ферме. Вы можаце займацца спортам ці рамяством, захапляцца навукай ці пісаць кнігі, збіраць ягады або маляваць карціны.

Удзел у ініцыятыве для вас - гэта выдатная магчымасць пагутарыць з прафесіяналамі ў галіне кіравання і захопленымі сваёй справай людзьмі, прыцягнуць увагу да сваёй дзейнасці, даведацца пра міжнародны досвед, падзяліцца выклiкамi і рашэннямі, якія могуць стаць асновай для далейшых сур'ёзных праектаў.

Гучыць цікава?

Падаць заяўку можна 25-га лютага да 23:59, запоўніўшы форму. Арганізатары звяжуцца з кожнай з абраных удзельніц наўпрост, каб узгадніць дэталі ўдзелу ў ініцыятыве #ЦеньНаДзень.

Стажыроўкі пройдуць у сакавіку і красавіку.

Поделиться новостью